معتکف کا اعتکاف میں چندہ وغیرہ کیلئے اعلان کرنا
سوال
معتکف کو مسجد میں اعتکاف کے دوران سحری کے وقت جگانے یا رمضان میں ختمِ قرآن کی مٹھائی کے لیے چندہ کے اعلان میں حصہ لینا یا خود اعلان کرنا جائز ہے یا نہیں؟
جواب
۱،۲۔ اگر سحری کے وقت اٹھانے کیلئے اعلان کرنے والا شخص موجود ہے ، ایسے ہی تعمیر کیلئے چندہ کا اعلان کرنے والا شخص موجود ہے تو معتکف کو اس اعلان میں حصہ شامل نہیں کرنا چاہیے، اور اگر جگانے والا اور تعمیر کیلئے چندہ کا اعلان کرنے والا کوئی شخص نہیں ہے تو ایسی صورت میں مسجد شرعی کی حدود میں رہتے ہوئے ایک آدھ مرتبہ اعلان کرنے کی گنجائش ہے، تاہم اس کو مشغلہ نہ بنائے کیونکہ یہ مقصدِ اعتکاف کے خلاف ہے۔
۳۔ رمضان میں ختمِ قران کے موقع پر مٹھائی کیلئے چندہ کرنا کئی مفاسد پر مشتمل ہونے کی وجہ سے شرعاً درست نہیں ، اس لئے اس کے اعلان سے بھی احتراز کیا جائے، معتکف یا غیر معتکف کوئی بھی اس کا اعلان نہ کرے۔
تاہم اگر معتکف نے مذکورہ بالا اعلانات میں سے کوئی اعلان مسجد شرعی کی حدود میں رہتے ہوئے کردیا تو اس سے اس کا اعتکاف باطل نہ ہوگا۔
فقط واللہ اعلم
حوالہ: روزہ